Saturday, November 21, 2026
ADVERTISEMENT
ADVERTISEMENT
Homeமாவட்ட செய்திகள்சென்னை – கொல்லம் இடையே காட்பாடி, நாமக்கல், மதுரை, செங்கோட்டை வழியாக சபரிமலை சிறப்பு ரயில்களை...

சென்னை – கொல்லம் இடையே காட்பாடி, நாமக்கல், மதுரை, செங்கோட்டை வழியாக சபரிமலை சிறப்பு ரயில்களை இயக்க நாமக்கல் எம்பி கோரிக்கை

சென்னையில் இருந்து கேரள மாநிலம் கொல்லம் வரை காட்பாடி, நாமக்கல், மதுரை, செங்கோட்டை வழியாக சபரிமலை சிறப்பு ரயில்களை இயக்க வேண்டும் என நாமக்கல் எம்பி., வி.எஸ்.மாதேஸ்வரன் மத்திய ரயில்வே துறை அமைச்சர் அஸ்வினி வைஸ்னவ்-க்கு கோரிக்கை விடுத்துள்ளார்.

இது குறித்து அவர் மத்திய ரயில்வே துறை அமைச்சருக்கு அனுப்பியுள்ள மனுவில் குறிப்பிட்டுள்ளதாவது:

சபரிமலை மண்டல – மகரவிளக்கு யாத்திரைக் காலத்தில், தமிழ்நாட்டின் பல்வேறு பகுதிகளிலிருந்து ஏராளமான ஐயப்ப பக்தர்கள் கேரள மாநிலம் சபரிமலைக்குச் செல்வதைக் கருத்தில் கொண்டு, காட்பாடி, நாமக்கல், மதுரை, செங்கோட்டை வழியாக சென்னை மற்றும் கொல்லம் இடையே சிறப்பு ரயில்களை இயக்க வேண்டியதன் அவசியத்தைத் தங்களது கவனத்திற்குக் கொண்டுவர விரும்புகிறேன். கிறிஸ்துமஸ், ஆங்கிலப் புத்தாண்டு மற்றும் பொங்கல் பண்டிகை விடுமுறைகள் நெருங்கி வருவதால், குறிப்பாக கேரளாவிற்குப் பயணிக்கும் ஐயப்ப பக்தர்கள் மற்றும் பொதுமக்களின் பயணத் தேவை கணிசமாக அதிகரிக்கும் என எதிர்பார்க்கப்படுகிறது. இருப்பினும், அண்மையில் நடைபெற்ற தீபாவளிப் பண்டிகைக் காலத்தின்போதுகூட, மாநிலத் தலைநகரான சென்னையிலிருந்து சேலம் – நாமக்கல் – கரூர் வழித்தடத்தை இணைக்கும் வகையில் எவ்வித சிறப்பு ரயில்களும் இயக்கப்படாதது வருத்தமளிக்கிறது. இதனால் இப்பகுதி பயணிகள் பெரும் சிரமத்திற்கு உள்ளாகினர்.

காட்பாடி, நாமக்கல், மதுரை, செங்கோட்டை வழியாக இயக்கப்படும் சென்னை – கொல்லம் சபரிமலை சிறப்பு ரயில், சென்னை மற்றும் அதன் சுற்றுவட்டாரப் பகுதிகளைச் சேர்ந்த ஆயிரக்கணக்கான ஐயப்ப பக்தர்களுக்கு நேரடி ரயில் இணைப்பை வழங்குவதுடன், நாமக்கல், சேலம், கரூர் மற்றும் சுற்றியுள்ள மாவட்டங்களைச் சேர்ந்த பயணிகளுக்கும் பெரிதும் பயனுள்ளதாக அமையும்.

எனவே, இவ்வழித்தடத்தின் முக்கியத்துவத்தையும் பயணிகளின் தேவையையும் கருத்தில் கொண்டு, தற்போதைய சபரிமலை யாத்திரைக் காலம் மற்றும் வரவிருக்கும் பண்டிகை விடுமுறை நாட்களில் சென்னை – கொல்லம் இடையே மேற்கண்ட வழித்தடத்தின் வழியாகப் போதிய எண்ணிக்கையில் சபரிமலை சிறப்பு ரயில்களை இயக்கிட தெற்கு ரயில்வே நிர்வாகத்திற்கு உரிய அறிவுறுத்தல்களை வழங்குமாறு தங்களை அன்புடன் கேட்டுக்கொள்கிறேன்.

இத்தகைய சிறப்பு ரயில் சேவைகள் ஆயிரக்கணக்கான பக்தர்களுக்குப் பெரும் உதவியாக இருப்பதுடன், ஏற்கனவே இயங்கி வரும் ரயில்களில் பயணிகள் நெரிசலைக் குறைக்கவும், இவ்வழித்தடத்தில் உள்ள ரயில்வே வசதிகள் குறைவாக உள்ள பகுதிகளுக்கு மேம்பட்ட ரயில் இணைப்பை வழங்கவும் உதவும். பொதுமக்களின் நலன் கருதி முன்வைக்கப்படும் இக்கோரிக்கையைத் தாங்கள் கனிவுடன் பரிசீலித்து, விரைந்து உரிய நடவடிக்கை மேற்கொள்ளுமாறு அன்புடன் கேட்டுக்கொள்கிறேன்.

RELATED ARTICLES
- Advertisment -
error: Content is protected !!