நாமக்கல் மாவட்டத்தில் தமிழக முதல்வர் ஆணைக்கிணங்க, முதலமைச்சரின் உழவர் நல சேவை மையங்கள் அமைத்திட வேளாண் பட்டதாரிகள் மற்றும் பட்டயதாரர்களுக்கு 30 சதவீத மானியமாக ரூ.3 லட்சம் முதல் ரூ.6 லட்சம் வரை சுயதொழில் துவங்க மானியம் வழங்கப்பட உள்ளது. இவ்வாய்ப்பினை வேளாண் பட்டதாரிகள் முழுமையாக பயன்படுத்திக் கொள்ள வேண்டும் என மாவட்ட ஆட்சியர் துர்காமூர்த்தி தெரிவித்துள்ளார்.
வேளாண் பட்டப்படிப்பு, பட்டயப்படிப்பை முடித்த இளைஞர்களின் படிப்பறிவும், தொழில்நுட்பத்திறனும் உழவர் பெருமக்களுக்கு உதவியாக இருந்து வேளாண் உற்பத்தியினை உயர்த்திடும் வகையில் நாமக்கல் மாவட்டத்தில் வேளாண்மைத்துறையின் மூலம் 15 உழவர் நல சேவை மையங்கள் அமைத்திட இலக்கு பெறப்பட்டுள்ளது.
இத்திட்டத்தில், ரூ.10 லட்சம் முதல் ரூ. 20 லட்சம் வரையிலான மதிப்பில் உழவர் நல சேவை மையங்கள் அமைத்திட 30 சதவீத மானியமாக ரூ. 3 லட்சம் முதல் ரூ.6 லட்சம் வரை மானியம் வழங்கப்பட உள்ளது. இம்மையங்களில் உழவர்களுக்குத் தேவையான விதைகள், உரங்கள் மற்றும் பூச்சி கொல்லி மருந்துகள் உள்ளிட்ட இடுபொருட்கள் விற்பனை செய்யப்படுவதோடு, வேளாண் உற்பத்தியைப் பெருக்கவும், பயிர்களில் ஏற்படும் பூச்சி, நோய் மேலாண்மைக்குத் தேவையான ஆலோசனைகளும், வேளாண் விளைபொருட்களை மதிப்புக்கூட்டுதல் குறித்த ஆலோசனைகளும் வழங்கப்படும்.
முதலமைச்சரின் உழவர் நல சேவை மையங்கள் மூலம் விவசாயிகள் ஒரே இடத்தில் அனைத்து சேவைகளையும் பெற உதவுவது மட்டுமல்லாமல், வேலையில்லாத வேளாண் பட்டதாரிகள், பட்டயதாரர்கள் சுயதொழில் செய்வதற்கும் வாய்ப்பும் ஏற்படுத்தப்படுகிறது. இத்திட்டத்தில் இணையும் வேளாண் பட்டதாரிகள் , பட்டயதாரர்கள் உழவர்நல சேவை மையங்களை சிறப்பாக நடத்தும் வகையில் வேளாண்மை உழவர்நலத்துறையில் வழங்கப்படும் அனைத்து உரிமங்களும் முதலமைச்சரின் உழவர் நல சேவை மைய வேளாண் பட்டதாரிகள், பட்டயதாரர்களுக்கும் வழங்கப்படும். இத்திட்டத்தில் இணையும் வேளாண் பட்டதாரிகள், பட்டயதாரர்களின் தொழிலநுட்பத் திறனை மேம்படுத்தும் வகையில் மாவட்டத்தில் உள்ள உழவர் பயிற்சி நிலையம், வேளாண் அறிவியல் நிலையம் மூலம் பயிற்சியும் அளிக்கப்படும். மேலும் விபரங்களுக்கு அருகில் உள்ள வட்டார வோளண்மை உதவி இயக்குநரை அணுகி பயன்பெற ஆட்சியர் கேட்டுக்கொண்டுள்ளார்.
எனவே, இத்திட்டத்தில் பயனடைய விரும்பும் 20 முதல் 45 வயதுக்குட்பட்ட வேளாண் சார்ந்த பட்டப்படிப்பு, பட்டயப்படிப்பு முடித்த நபர்கள் உரிய வங்கியில் விரிவான திட்ட அறிக்கையுடன் கடன் பெற விண்ணப்பிக்க வேண்டும். வங்கி நடைமுறைகளைப் பின்பற்றி கடன் ஒப்புதல் பெறப்பட்டபின், இத்திட்டத்தில் மானிய உதவி பெற AGRISNET https://www.tnagrisnet.tn.gov.in/KaviaDP/register என்ற இணையதள முகவரியில் உரிய ஆவணங்களை சமர்ப்பித்து விண்ணப்பிக்கலாம்.
முதலமைச்சரின் உழவர் நல சேவை மையங்கள் அரசின் உதவியுடன் துவங்கப்படும் சுய தொழில் என்பதால் இந்த அரிய வாய்ப்பினை பயன்படுத்திக் கொள்ளுமாறு வேளாண் பட்டதாரிகள், பட்டயதாரர்களுக்கு ஆட்சியர் தெரிவித்துள்ளார்.
