தமிழ்நாடு பிஎஸ்என்எல் நிறுவனம் சார்பில் சென்னை அண்ணா சாலையில் உள்ள பிஎஸ்என்எல் அலுவலகத்தில் ஊழலுக்கு எதிரான விழிப்புணர்வு வார விழா நடைபெற்றது. இந்நிகழ்ச்சியில் பிஎஸ்என்எல் தலைமை பொது மேலாளர் எஸ். பார்த்திபன் தலைமை வகித்தார். இதில் தமிழ்நாடு லோக் ஆயுக்தா உறுப்பினர் டாக்டர் வீ. ராமராஜ் சிறப்பு விருந்தினராக கலந்து கொண்டு பேசினார். விழாவில் அவர் பேசியது:
ஊழலை ஒழிப்பதில் ஒவ்வொருவருக்கும் பங்கு உள்ளது என்பதே இந்த ஆண்டின் ஊழல் விழிப்பு பணி வாரத்தின் கருப்பொருளாகும். கடந்த 2005 ஆம் ஆண்டு ஐக்கிய நாடுகள் சபையின் ஊழலுக்கு எதிரான சர்வதேச ஒப்பந்தத்தில் இந்தியா உள்ளிட்ட பெரும்பாலான நாடுகள் கையொப்பம் செய்துள்ளன. இந்த மாநாட்டில் கையெழுத்திட்ட ஒவ்வொரு நாட்டின்அரசாங்கமும் ஐக்கிய நாடுகளின் ஊழல் எதிர்ப்பு மாநாட்டின்படி செயல்பட வேண்டும், இது அவர்களின் பகிரப்பட்ட பொறுப்பாகும். ஒவ்வொரு நாட்டின் அரசாங்கத்தையும் தேர்ந்தெடுக்கும் ஒவ்வொரு வாக்காளரும் ஊழலை ஒழிப்பதில் தங்கள் பங்கைச் செய்ய வேண்டிய பகிரப்பட்ட பொறுப்பைக் கொண்டுள்ளனர் என ராமராஜ் தெரிவித்தார்..
ஊழல் இல்லாத நிர்வாகம் மற்றும் உலக அமைதிக்கான அடித்தளம் வாக்காளர் விழிப்புணர்வு ஆகும். வாக்கு, வாக்காளர் மற்றும் தேர்தல்கள் குறித்து அனைவரும் படித்து அறிந்து கொள்ளும் வகையில் வாக்காளரியல் (Voterology) கல்வியை பள்ளி கல்லூரி மற்றும் பல்கலைக்கழகங்களில் அறிமுகப்படுத்த வேண்டிய பொறுப்பு அரசுக்கு உள்ளது. “எல்லாவற்றிற்கும் மேலாக வாக்காளர்கள்” என்பது. வாக்காளரிலிசத்தின் மையக் கருத்தாகும். வாக்காளரியல் கோட்பாடுகளை பரப்புவதே வாக்காளரிலிசத்தின் வேலையாகும் என ராமராஜ் தெரிவித்தார்.
ஜனநாயகத்தில் உச்ச அதிகாரமான வாக்களிக்கும் உரிமை வாக்காளர்களிடம் உள்ளது. ஜனநாயக அரசாங்கத்தின் தன்மையையும் உலக அரசியல் போக்குகளையும் வாக்கு மட்டுமே தீர்மானிக்கிறது. வாக்காளர்கள் தேர்தலில் வாக்களிக்கும்போது, ஜனநாயகம் தொடங்குகிறது. ஒவ்வொரு வாக்காளரும் தேர்தல்கள் மூலம் அமைக்கப்படும் அரசாங்கம் ஊழலற்றதாக இருக்க வேண்டும் என்று விரும்புகிறார்கள். ஆனால், ஜனநாயகத்தின் மூன்று அம்சங்களான வாக்குகள், வாக்காளர்கள் மற்றும் தேர்தல்கள் ஆகியவற்றிலிருந்து ஊழல் தொடங்கினால், ஊழல் இல்லாத ஜனநாயக ஆட்சியை நாம் எதிர்பார்க்க முடியாது. ஜனநாயகத்தின் அடித்தளமாக விளங்கும் வாக்கு, வாக்காளர் மற்றும் தேர்தல்கள் ஆகியவற்றிலிருந்து ஊழலை ஒழிப்பதற்கான பொறுப்பு (shared responsibility) வாக்காளர்களுக்கு உள்ளது என்றார் ராமராஜ்.
இந்தியாவில் ஊழலைத் தடுக்க ஊழல் தடுப்புச் சட்டம், மத்திய ஊழல் கண்காணிப்பு ஆணையச் சட்டம், பணமோசடி தடுப்புச் சட்டம், பினாமி பரிவர்த்தனை தடுப்புச் சட்டம், மத்திய லோக்பால் மற்றும் லோக்ஆயுக்தா சட்டம் மற்றும் மாநிலங்களில் லோக்ஆயுக்தா சட்டங்கள் உள்ளிட்ட பல சட்டங்கள் இந்தியாவில் ஊழலை தடுக்க இயற்றப்பட்டுள்ளன. தேசிய அளவில் மத்திய ஊழல் கண்காணிப்பு ஆணையம், அமலாக்கத்துறை, வருமானவரித்துறை, சட்ட விரோத பண பரிவர்த்தனை தடுப்பு ஆணையம் லோக்பால் மற்றும் காவல்துறை உள்ளிட்ட அமைப்புகள் எதிரான நடவடிக்கைகளை மேற்கொண்டு வருகின்றன. மாநிலங்களில் மாநில ஊழல் கண்காணிப்பு மற்றும் ஊழலுக்கு எதிரான காவல் பிரிவு, மாநில ஊழல் கண்காணிப்பு ஆணையம், மற்றும் லோக் ஆயுக்தா ஊழலை அகற்றும் பணியில் ஈடுபட்டுள்ளனர். மத்திய மற்றும் மாநில அரசுகளின் ஒவ்வொரு துறையிலும் ஊழல் கண்காணிப்பு பிரிவு செயல் பட்டு வருகிறது.
ஊழலுக்கு எதிரான சட்டங்கள் மற்றும் அமைப்புகள் இருந்தாலும் இவற்றை குறித்த விழிப்புணர்வு பொதுமக்களிடம் போதுமான அளவு இருந்தால்தான் ஊழலை ஒழிக்க நடவடிக்கைகளை மேற்கொள்ள இயலும். பள்ளிகள் கல்லூரிகள் மற்றும் பல்கலைக்கழகங்களில் ஊழல் ஒழிப்புச் சட்டங்கள் மற்றும் அமைப்புகள் குறித்த கல்வி குறைந்தபட்சம் ஒரு பாடமாக மாணவர்களுக்கு இருக்க வேண்டும். வரலாறு, அரசியல் அறிவியல், பொருளாதாரம், பொது நிர்வாகம் போன்ற பிரிவுகளின் முதுகலை பட்டப்படிப்புகள் பல பல்கலைக்கழகங்களில் நடத்தப்படுகின்றன ஆனால் நல்லாட்சி (good governance) தொடர்பான முதுகலை பட்டப் படிப்புகள் இந்தியாவில் ஒரு சதவீதத்துக்கும் கீழான பல்கலைக்கழகங்களில் மட்டுமே நடத்தப்படுகின்றன. நல்லாட்சி மற்றும் ஊழல் எதிர்ப்பு கல்வியில் முதுகலை பட்டப் படிப்புகளை அதிக அளவில் கல்லூரிகளில் அறிமுகப்படுத்த பல்கலைக்கழகங்கள் நடவடிக்கைகளை மேற்கொள்ள வேண்டும் என ராமராஜ் வலியுறுத்தினார்
இந்நிகழ்ச்சியில் விழிப்புணர்வு - பகிரப்பட்ட பொறுப்பிற்கான வலுவான மன உறுதி குறித்து முதன்மை பொது மேலாளர் (மனிதவளம் மற்றும் நிர்வாகம்) டி.எம். பாஸ்கரன் சொற்பொழிவு ஆற்றினார். கண்காணிப்புப் பிரிவின் துணைப் பொது மேலாளர் தனராஜ், பிஎஸ்என்எல் அதிகாரிகள், ஊழியர்கள் இந்த நிகழ்வில் கலந்து கொண்டனர்.
