ராசிபுரம் வட்டாரப் போக்குவரத்து பகுதி அலுவலகம் சார்பில் நடைபெற்ற திடீர் வாகனச் சோதனையில் தகுதிச் சான்று புதுக்கப்பிக்கப்படாத 7 வாகனங்கள் பறிமுதல் செய்து வட்டாரப் போக்குவரத்து அலுவலர்கள் நடவடிக்கை மேற்கொண்டுள்ளனர். நாமக்கல் வட்டாரப் போக்குவரத்து அலுவலர் எம்.பதுவைநாதன் தலைமையில் ராசிபுரம் மோட்டார் வாகன ஆய்வாளர் ஏ.செல்வகுமார் ராசிபுரம் மற்றும் அதன் சுற்றுவட்டாரப் பகுதிகளில் வெள்ளிக்கிழமை சிறப்பு வாகன தணிக்கை மேற்கொண்டார்.
இதில், தகுதி சான்று புதுப்பிக்கப்படாத 5 டாட்டா ஏஸ் வாகனங்களும், 2 பயணியர் ஆட்டோ ரிக்சாக்கள் சிறைபிடிக்கப்பட்டு ராசிபுரம் மோட்டார் வாகன ஆய்வாளர் பகுதி அலுவலகத்தில் நிறுத்தப்பட்டுள்ளது. அதேபோன்று அனுமதிக்கு புறம்பாக அதிக பாரம் ஏற்றி இயக்கப்பட்ட 5 கனரக சரக்கு வாகனங்களுக்கு சோதனை அறிக்கை வழங்கப்பட்டு நடவடிக்கை மேற்கொள்ளப்பட்டது. இச்சிறப்பு தணிக்கை மூலம் ரூ.3 லட்சம் இணக்க கட்டணமாக நிர்ணயம் செய்யப்பட்டு வாகனங்கள் மீது நடவடிக்கை மேற்கொள்ளப்பட்டது. இதுபோன்று சிறப்பு வாகன தணிக்கை, ராசிபுரம், நாமகிரிப்பேட்டை, ஆயில்பட்டி, மங்களபுரம், வெண்ணந்தூர் ஆகிய பகுதிகளில் அடிக்கடி நடைபெறும் என வட்டாரப் போக்குவரத்து அலுவலர் எம்.பதுவைநாதன் தெரிவித்துள்ளார்.
